Yume

 

Direición: Cai La Estación, Nº27 - Avilés
Teléfonu: 984 297 037 / 627 500 493

Recomendaciones: Ensalada de Tofu de Rey Silo

https://www.facebook.com/yumegastro

Calidá: 3/5

Preciu: 25€

Comentarios: Últimamente nun faemos más que probar sitios nuevos n'Avilés, como la última visita al Apiñón Bistró. Nesta ocasión fuimos a Yume, nueva propuesta de cocina gayolera y pa tolos públicos qu'acaba d'abrir Iratxe Miranda, la hermana de Koldo Miranda, n'Avilés.

Llocal céntricu, asitiáu nel Barriu Sabugu, qu'adulces vuelve recuperar la so rellumanza y que nos ufierta les meyores propuestes gastronómiques agora mesmu n'Avilés. Estrechu, pequenu pero atopadizu, cola cocina al fondu dafechu abierta pa que veas en tou momentu qué tán cocinando. Decoración actual, amiestu de toques industriales y tradicionales, meses pequenes, con sielles distintes ... tou con un toque modernu bien cuidao.

La cocina ye asiática con toques asturianos. Asiática "pa tolos públicos", ensin metenos en coses demasiáu complicaes pero con sabores frescos y distintos pa probar. Too ye pa compartir y va al centru de la mesa, y los cubiertos prácticamente nun fai falta utilizalos. Un conceutu distintu que presta.

Acabo lleer que Yume significa suañu en xaponés. Nun creo que lo sepan, pero Llume, en llingua asturiana ye la Lluz, y amás, el llar, sitiu de la cocina onde se priende'l fueu. Interesante conexón.

Cenamos cuatro persones. Y pidimos.

Gyoses (Gambes al Ayu, Tenral Terrillaki, Verdures y Romescu Asiáticu). Les Gyoses son una especie d'empanadilles cocinaes al vapor bien famoses na cocina xaponesa. Pidimos dos tapes pa poder probar cada ún les distintes variedaes. Mui riques.

Siguimos colos Baos, una especie d'hamburguesa taiwanesa, o de bocaos pequenos, que sirven como tentempié y que pueden rellenase de los ingredientes favoritos. Probemos toos, Bao de Calamar con Llimón, Bao de Pollu n'Escabeche y Bao de Papada Thai con Xenxibre. Gustáronnos toos, unos más cítricos, otros más duces ... si dabes col orde correutu, ye un platu distintu, gayoleru y perricu.

Lo que más prestó de tola cena foi la Ensalada de Tofu de Rey Silu, Mazana, Almendra y Wasabi. Col quesu Rei Silu por mediu, la combinación yera ganadora. Quesu de lleche entero y crudo de vaca, nidiu pero con personalidá, La ensalada amás tien un toque afumau mui interesante.

El platu que menos prestó foi la Fritura de Pexes y Cámbaros con Tamarindu y Matcha, que nun dexen de ser dos chicharros y dos andariques en tempura. Eso sí, la presentación bien bona.

Pal postre encamentáronnos el Mochi, un pastel xaponés. Pero nun-yos quedaba, asina que tomamos un Magnum de Chocu, Xenxibre y Pimienta de Xamaica. El Magnum ye un Magnum (xeláu industrial de Frigo) con una bona presentación.

Carta de Vinos y Cerveces pequena, pero con referencies de distintes denominaciones. Nenguna referencia asturiana, salvo l'Agua Borines. Estimaríase dalgún chisgu más, yá que por casu bebimos Mar de Frades Brut Nature, productu que nos encanta y paeznos interesante, pero resulta curiosu incluyilo cuando tenemos na tierra Brut Nature de Sidra a lo menos de la mesma calidá.

Pagamos les 4 persones 102,75€.